Rugbywêreldbeker 2023
Die voormalige Springbok-kaptein en oud-Haai-slot Johann Muller het in van die wêreld se bekendste stadions uitgedraf – Twickenham in Londen, Murrayfield in Edinburg, Stade de France in Parys . . .
Johann het 25 toetse en twee Wêreldbekerkampioenskappe agter die rug. Hy was deel van die Bokgroep wat die Wêreldbeker in 2007 gewen het toe hulle Engeland in die eindstryd met 15-6 geklop het.
Maar terwyl hy en sy spanmaats dwarsoor die wêreld rugbygeskiedenis verewig het, wou Johann nog altyd teruggaan na “die lekkerste plek” waar hy al ’n rugbybal gegooi het – hul familieplaas buite Mosselbaai.
Die plaas Patrysfontein is al vir ses generasies en meer as 200 jaar in die Muller-familie. Daar is nog altyd met “iets van alles” geboer: volstruise, skape, melk- en vleisbeeste en graan. Dit is ook hier waar Johann plaasrugby saam met die werkers se kinders gespeel en hy en sy broer, Ignatius, mekaar bloedneus gegee het in die stryd om die bal.
Hy en sy vrou, Mariska, wou hul drie kinders op die platteland grootmaak en toe Johann in 2014 sy rugbystewels ophang, het die besluit maklik gekom om heeltyds saam met sy pa en broer te boer.
“Dit was ’n hengse voorreg om