Op Groot Phesantekraal, ’n vierdegeslagplaas waarop met graan, vee en wingerde digby Durbanville geboer word, word daar deesdae koring gesaai op grond waar dit 25 jaar gelede nie moontlik was nie.
“Ek kan onomwonde sê ons getal hektare op die plaas het toegeneem. Ons marginale grond raak minder en die hoëpotensiaalgrond meer,” sê mnr. André (Oubaas) Brink, wat al sedert 1985 op die historiese Groot Phesantekraal boer. Sowat 55% van sy boerdery bestaan uit graan en oliesade, 35% uit vee en die balans uit wingerd en wild.
Hy glo grond is te duur om dit nie na behore te benut nie, daarom doen hulle wat nodig is om sowat 10 ha grond per jaar te herwin, of dit nou fisiese of chemiese regstellings vereis. Met sy medicsstelsel verbeter hy ook jaarliks sy grond se “immuunstelsel”.
Brink vertel hul graangradering is uitstekend en opbrengste het mettertyd toegeneem. Hy skryf dit uit en uit aan grondgesondheid toe.
“Daar is kampe waar ons 4,5 t/ha (koring) haal, maar daar is ook grond wat nog nie reg is nie. Dus behoort ons gemiddelde 4 t/ha plus te handhaaf. Ek dink 60% van ons opbrengs is danksy die grond en 40% danksy kultivars. Ons is afhanklik van winterreën, en hoe gesonder ons grond is, hoe langer kan dit water hou en wortels gesond hou.”
‘GENERAAL’ IN DIE STROPER
Hy boer op sowat 4 000 ha. Hy het twee seuns, Rennie en Jeandré, wat reeds hul plek in die boerdery