‘YES, boys, laat die dag begin!” Dis net ná sesuur op ’n Maandagoggend. Baie mense is nog nie eens wakker nie, maar van sy lessenaar in die kantoor van sy produksiemaatskappy, Provoco, in Centurion, roep Rian van Heerden sy span op tot aksie.
Langs die vier stapels lêers op die lessenaar is sy stampvol A4-dagboek by vandag se datum opgeslaan.
Een van sy produksiebestuurders, Carl Swart, het reeds vir hom sy eerste koppie koffie gebring. Dis die eerste van baie koppies, want Rian is ’n man wat van sy koffie hou – en dit duidelik nodig het vir al die hordes dinge wat hy daagliks aandurf. Hy weet nie hoeveel koffie hy op
