ROETE KWAZULU-NATAL
DAG 1
Oribiravyn na Kamberg (266 km)
Die miswolke trek vanoggend vinnig weg teen sonsopkoms, en ek stap die paar honderd meter van my chalet in die Oribiravyn-natuurreservaat tot by die Baboon-uitkykpunt waar die diep, beboste kloof voor my lê.
Die Oribiravyn is ’n plek waar jy kan stap (hier is ’n paar kort dagroetes), sommer net padlangs piekniek hou, of tjoepstil sit met jou verkyker en wag vir ’n knysnaloerie om sy rooi vlerke tussen die bome te flits. Van hier waar ek met my fleskoffie sit, sny die Umzimkulwanerivier nog vir ongeveer 20 km ooswaarts deur die landskap – dan sluit dit aan by die groter Mzimkhulurivier wat 9 km verder by Port Shepstone wyd en bruin in die Indiese Oseaan uitmond.
Dalk het jy hier aan die KZN-Suidkus kom uitspan en dis tyd vir terug Gauteng toe mik. Die enigste probleem is... jy’s nog nie uitgevakansie nie! Dan is dié roete spesiaal vir jou, want dit skram doelbewus weg van die groter paaie en korrel noordwaarts na die Drakensberg. Padlangs ry jy deur dramatiese landskappe en oor jolige riviere (jy ry weer ’n slag oor die Mzimkhulu, net hoër bo seespieël), en ervaar trapsgewys hoe die wêreld rondom jou verander namate jy hoër en hoër klim: van die Suidkus se suikerrietplantasies tot teen die mistige kranse van die Amfiteater waar die Tugelarivier aftuimel.
Die roetemerkers hierlangs kan soms verwarrend wees – en daarom verskaf ek stap-vir-stap aanwysings sodat jy maklik kan saamtoer. Jy ry soms teerpad, maar ook grondpaaie wat in die reënseisoen vra vir ’n bakkie of sportnutsvoertuig.
Koffie en drie beskuite
