MIDDEL
NamibRand-natuurreservaat
Dié 2 250 km²-reservaat is geseën met beeldskone landskappe, ’n oorvloed fauna en flora, en ongeëwenaarde fotogeleenthede. Dit maak nie saak of jy stap, ry of op ’n begeleide toer is nie, die duine, vlaktes en valleie gáán jou oorrompel.
Hier’s ’n paar blyplekke in die reservaat. Die Family Hideout (#111, bl. 104) is ’n bekostigbare keuse. Die opgeknapte en smaakvolle plaashuis is net reg vir ’n klein groep vriende terwyl avontuurlike reisigers aanklank sal vind by die drie private kampplekke met ’n geriefie of twee (spoeltoilette en warm water).
– Phil Sturgess en Carina de Klerk
MIDDEL
Gamsbergpas
Namibië is nie juis bekend vir bergpasse nie. Maar om van die Khomas Hochland-plato in die middel van die land na die woestyn te ry moet jy bergaf. En die mooiste roete om dít langs te doen is die C26-grondpad van Windhoek af oor die Gamsbergpas (2 347 m).
Dis Namibië se langste en hoogste pas – die daling is ’n hele 1 100 m! Die kronkels vat jou verby pragtige plantegroei, koedoes, sebras en klipspringers. Dis só mooi hier, mense noem dit die Tuinroete van Namibië. Gee jouself genoeg tyd om die pas te ry, want daar is baie plekke om stil te hou en oor die berge en die woestyn uit te kyk. En as jy nog meer