BERTUS staan en bekyk vir ’n oomblik die hoë heining en hek aan die sykant van Jacqueshulle se huis. Moet hy met sy plan deurdruk?
Hy het pas sy twee vriende in die TVkamer aan die agterkant van die huis gegroet waar hulle gekuier het, deur die huis geloop en by die voordeur uit. Op die voorstoep het hy vasgesteek.
Jacques en Abrie is al lankal boesemvriende, en hoewel hulle ook vir Bertus ’n ruk gelede as vriend aanvaar het, is hy die laatkommer in die driemanskap. Soos so dikwels op ’n Saterdagoggend het hulle sommer sit en ginnegaap, maar hy moet toe vroeër loop om sy pa te gaan help om bakstene te laai.
Sê nou dis waar dat twee kan vriende wees, maar drie te veel is? Sy suster het hom al dikwels vertel dat hy hom dinge te maklik verbeel en mense te min vertrou. Hoewel hy al probeer het om die gedagte opsy te skuif, het dit in