PEERTJIES
Skaappeertjies (of Karoo-oesters) is die testikels van lammers wat afgesny of afgebind word. Dit is fynproewerskos en op sy beste as dit met ’n suur sousie voorgesit word.
PANNAS
’n Ou Duitse ontbytgereg wat hoofsaaklik van gekapte lewer (en soms die hart en niertjies van ’n lam) gemaak word. Die pootjies van ’n vark of skaap word lank en stadig gekook. Dan word van die vloeistof waarin dit gekook is, by die lewermengsel gevoeg voor die mengsel gegeur en verder met meel verdik word. Daarna word dit in ’n broodpan of terrienvorm gegooi om te stol. Sodra dit gestol het, word dik skywe pannas in botter of vet gebraai en met ’n mosterd-of suur sous voorgesit.
HARSINGS
As jy tradisionele afval kook, word die harsings meestal in die ruitjiespens toegebind om te keer dat dit wegkook. Harsings kan ook afsonderlik gaargemaak word. Dit is ryk en geurig; berei dit dus eenvoudig voor — net met sout en peper, geposjeer of in die oond gebak.
HAKSEL
Dit word gemaak van gaar harslag, gewoonlik die