‘ALTYD ’N NUWE AVONTUUR OM DIE DRAAI’
Françoise Malby-Anthony
Toe Françoise se natuurbewaarder-man, Lawrence Anthony, skielik in 2012 aan ’n hartaanval oorlede is, het baie mense gedink dis die einde van Thula Thula, die tuiste van sy bekende trop olifante in KwaZulu-Natal.
Maar tien jaar later, met Françoise aan die stuur, vaar die wildreservaat beter as ooit. “Ek en Lawrence het Thula Thula eintlik saam bestuur, maar mense het my nie geken nie omdat ek agter die skerms aan dinge soos die finansies gewerk het. En selfs dié wat geweet het van my, het gedink ek sal teruggaan na my tuisland, Frankryk. Maar die gedagte het nooit eens by my opgekom nie,” vertel sy.
Lawrence se geliefde olifante, wat hy van gewisse dood gered het, was een groot rede daarvoor. “Twee dae ná sy dood het die trop voor ons huis kom staan. Hulle het dit nog nooit voorheen gedoen nie. En hulle het daar bly staan, asof hulle oor hom rou. ’n Jaar later, op dieselfde dag, het hulle dieselfde kom doen. Dit kan toeval
