Steenbokpan is nie ’n plek waar ’n mens toevallig uitkom nie. Selfs Google Maps dui die dorpie op die verkeerde plek aan, en daarom moet jy nie blindelings jou foon se aanwysings volg nie, maar eerder met jou kop hierheen ry.
By die kruispad noord van die dorpie sê die padbord die grondpad noordwaarts vat jou Stockpoort toe. Die oos-wespad is teer: Na die ooste toe lê Lephalale (die ou Ellisras) en wes lê Glenover, wat eintlik maar net ’n plaas en fosfaatmyn is.
Dít wat ’n mens Steenbokpan kan noem, lê meestal hier suid van die kruispad, met die woonbuurt Lesedi ’n paar honderd meter verderaan tussen bosveldbome verskuil. Die “sakesentrum” bestaan uit ’n vulstasie, winkel en die Bosveld Pub & Grill. By laasgenoemde kan jy jou bakkie se moeë snoet in die skadu van ’n maroelaboom trek en binne lafenis gaan soek.
Maar vandag is dit Saterdag, knap ná nege die oggend, en Mechanté Harmse se vierde verjaarsdagpartytjie begin. Eers moet 12 kinders hulle sit kry om die tafel sodat die grootmense kan foto’s neem. Mechanté lê met haar kop op haar arms en kyk na haar pienk Supergirl-koek. Die sonbesies sing al.
Uit die kombuis verskyn melkskommels, ja, maar ook ’n paar gin-drankies van Adel Vos, die mede-eienaar.