Kort nadat ek my kop én hart vrye teuels gegee het in die megalopolis van Clocolan in die Oos-Vrystaat, klim ek op ’n vliegtuig na die Keniaanse eiland Lamu. (Dié sin klink so windgat dat die winterbleek vlaktes van die Vrystaat sommer uitbars in helder kleur.) Ek was net te dankbaar die vliegtuig het nie neergestort toe ons opstyg nie. Ek sit die boek wat ek wil lees op my afslaantafeltjie neer: The Tattooist of Auschwitz deur Heather Morris.
My buurman in die sitplek aan die ander kant van die paadjie staar lank na die omslag van die boek, sy oë ernstig dog blink in ’n gesig wat oënskynlik deur plooie en lyne bymekaargehou word. Dit blyk gou hy is ’n Joodse finansier van Miami wat al die wêreld gesien en onlangs ook vir Donald Trump ontmoet het. Kom ek stel dit in sy taal: We got on like a plane on fire! Gedurende die vlug van vier uur Nairobi toe deel hy sy mening oor die Amerikaanse kiesstelsel, die Amerikaanse burgeroorlog, Viëtnam, die CIA, Mao Zedong, Mossad, Wladimir Poetin, die Russiese oligargie, Simon Wiesenthal, die nut van ’n handelsverbod, Iran, die Saudi’s en die benarde posisie waarin Israel hom bevind met sy vyandige Arabiese bure.
In ’n stadium, waarskynlik
