’N RESEP VIR DIE SEE
EK IS deur en deur ’n Saldanhabaaier. Ek is al die sesde of sewende generasie wat hier woon. Die ander voor my was almal vissermanne, maar ek het gevoel ek moet iets meer as net dit doen.
Vir lank was die visvangbedryf al wat ek geken het. Ek was vier jaar oud toe ek die eerste keer saam met van my ooms uitgegaan het om harders te vang. Hier in Saldanha is die sêding dat as jy see toe gaan vir werk, gaan jy óf vir Sea Harvest óf Saldanha Steel werk.
In 2007 het dié prentjie heeltemal verander. Transnet Saldanha het vir ons gr. 11-klas ’n uitstappie na Kaapstad gereël om meer te leer oor die maritieme industrie. Toe besluit ek ek gaan nie die gewone trend volg nie.
