DIE ENIGSTE UITWEG

“Ek het genoeg gehad, Lionel. Los ons net uit…”Lionel se vrou, Tina, sit die foon in sy oor neer en hy kry ’n knop in sy keel. Hy het soveel hartseer gesaai in sy gesin se lewens. Hy kan hulle nie verkwalik dat hulle hom afgeskryf het nie.

“Lionel… Nog twee minute,”kom dit oor sy gehoorstuk. Sy sorge moet vir eers agterbly. Soos gewoonlik.

“Goeienaand, almal!”Die gehoor ontplof van ekstase toe hulle Lionel se fluweelstem hoor. Hy is dié Lionel Legend. Die een wat almal beny. Die een wat almal wil wees. Die een wat almal wil hê. Op die verhoog betower hy sy bewonderaars met die een liedjie ná die ander. Hy leef homself uit in ’n wêreld wat hom aanbid. Dit is hier op die verhoog waar hy die lewendigste voel. Dit is hier voor sy aanhangers waar hy behoort en wil wees