BYT VAS EN DRUK DEUR

LYNETTE JANUARY (50) KLERE-ENTREPRENEUR

DIT was moeilik toe my tweede man skielik op 42 sterf. Hy het my weer die lewe leer liefhê en my en my kinders kom wys wat ’n pa moet wees. Maar dan moet ’n mens jouself afvra: Gaan ek bly lê?

Ek het by my oupa Charles en ouma Elsie grootgeword in Suurbraak, ’n klein dorpie anderkant Swellendam waar jy berg en rivier het. Van swaarkry het ons geken, want werk was skaars. Maar dit was ook lekker jare. Van my beste herinneringe was van varsgebakte brood, hoe ons oor daai korsie baklei, van swart koffie uit die kan wat altyd op die stoof staan wanneer jy instap. Van berg klim en buite in die boom sit en vye eet.

My oupa was ’n algemene werker, maar ook priester in die Nuwe Apostoliese Kerk,