Vlug AF820
DIE pad na Kaapstad se internasionale lughawe voel vanoggend baie langer as al die vorige kere wat ek Johannesburg toe moes vlieg om pasiënte te gaan evalueer. My hart voel asof dit in twee skeur.
Anton du Bois het my twee aande gelede meegedeel hy is ’n pos in Londen aangebied om die laaste drie jaar van sy B.Com.-rekeningkunde-internskap te gaan voltooi en dat hy nie in langafstandverhoudings glo nie.
Dit maal heeltyd in my kop hoe ons twee jaar terug een aand op die trein op pad huis toe ontmoet het. Daar was onmiddellik iets baie spesiaals tussen ons. Voor ons by die laaste stasie afklim om huiswaarts te keer, het ons altyd eers saam gebid en dan afskeid geneem.
Anton is ’n groot romantikus en het my altyd laat voel ons kan saam berge versit. Wanneer ons in mekaar se oë gekyk het, het niks anders rondom
