Wat John gesien het
Hy glo fotografie sal hom help om deur die oppervlak te breek.
J.M. Coetzee: Photographs from Boyhood, saamgestel in samewerking met Hermann Wittenberg. Uitgewer: Protea Boekhuis. Prys: R350.
In November 2017 e-pos ek die skrywer J.M. Coetzee. ’n Reeks swart-en-wit foto’s wat hy as skoolseun in die 1950’s geneem en self in die gesin se huis in Plumstead, Kaapstad, ontwikkel het, maak nuus drie jaar nadat dit toevallig ontdek is. Die persoonlike aard daarvan raak my onverwags.
Die daaropvolgende tentoonstelling in die Irma Stern-museum in Kaapstad ontlok groot belangstelling. Al die elemente is immers daar: die wêreldberoemde dog geslote skrywer; die spoeletjies ontwikkelde film in verroeste Ilford- en Afrox-blikkies wat dekades lank stof vergaar het op die solder van die skrywer se eertydse Rondeboschwoonstel; die verrassende visuele parallel wat die eindproduk vorm met die bittersoet grootwordwêreld wat die volwasse skrywer 40 jaar later in sy memoires Boyhood: Scenes from Provincial Life (die eerste van drie boeke) beskryf.
Ek skryf aan Coetzee in Engels, al weet ek hy verstaan Afrikaans.
Ek is onseker hoe hy oor die taal voel nadat hy in oor die Afrikaanse seuns van sy laerskooldae in Worcester sê
