Die Kalahari se fonteinwater
Tussen Askham en Noenieput is daar groot opgewondenheid oor water. Hier, diep in die Kalahari, het boere ’n daaglikse stryd om hul mense en diere genoeg water te gee.
Hulle is meestal afhanklik van boorgate met brakwater.
Baie boorgate het egter opgedroog weens die droogte en nou moet water aangery word. Ook na die gemeenskap van Noenieput, doer teen die lang, reguit grens met Namibië.
“Ek het gehoor die regering het ’n paar miljoen rand gegee sodat nog gate rondom die dorpie geboor kan word. Toe dink ek, nee wag, voor daai geld gemors word op droë en brak gate, kom ons maak ’n beter plan,” vertel mnr. Japie Engelbrecht, ’n boer naby Noenieput.
“Die munisipaliteit, boere en die Kalahari-Oos-watergebruikersvereniging het byeengekom en saam kon ons toe die geld en toerusting bymekaar maak sodat die Kalahari-Oos-pypleiding van Askham na Noenieput uitgebrei word.
“Dit gaan vir opkomende en kommersiële boere en die gemeenskap van Noenieput permanent vars water gee.
