Onder die Draak se ribbekas
Op Underberg is ’n mens deurentyd bewus van ’n groter “teenwoordigheid”. Dit is ook nie moeilik om agter te kom wat dit is nie: Net wes steek uKhahlamba gate in die wolke. ’n Stapel regop spiese, sê die Zoeloes. ’n Berg vol drake, het die Voortrekkers dit genoem. Enorm en vol geheime soos ’n slapende oerdier. En hier teen hom, reg onder sy ribbekas, lê Underberg.
Die dorp is klein en in die somer ’n ongelooflike geilgroen. Vol vlammende populiere in herfstyd. Ysig en baiekeer sneeuwit in die winter. Die naam is afgelei van die dorp se ligging: nie net aan die onderkant van die suidelike Drakensbergreeks nie, maar ook reg onder die kleiner Hlogomaspits wat oor die dorpie uitkyk.
Dit was juis Hlogoma wat die regering aan die einde van die negentiende eeu laat besluit het Underberg is nie veilig nie. Hulle het geglo die vyand kan maklik die nedersetting van die spits af binneval en daarom is Himeville, met ’n polisiefort, toe 5 km noord van Underberg gevestig. Daarna is Himeville, en nie Underberg nie, amptelik as “die dorp” beskou
