AGTERSTEVOOR
Die kolonel ontbied kaptein Sarel Cilliers na sy kantoor. “Ene Kevin Carelse het hom vir moord oorgegee. Ons het die liggaam gekry waar hy gesê het dit sal wees. Verder weier hy om te praat. Hy is toegesluit, maar ons kan hom nie vervolg voor ons nie die hele storie het nie. ’n Skulderkenning is nie genoeg nie.”
Junior, wat gewoonlik meer pla as help, moet Cilliers met die ondersoek bystaan. ’n Agterstevoor ondersoek: Hulle weet wie skuldig is, maar moet uitvind wat vóór die moord gebeur het.
Die moordtoneel is presies nog soos Forensies dit gelos het. Daar is ’n bloedkol op die bed.
“Hoe het Carelse haar vermoor, Kaptein?”
“Wie sê hy hét haar vermoor?”
“Kaptein?”
“Die grootste fout wat ’n speurder kan maak, is om vooraf te besluit wie skuldig is en sy ondersoek op daardie persoon te vestig. Jy
