Humanitatearen une gorenak
()
About this ebook
Ezinbestean agertzen dira hala irakurketak, lagunarteak, kotidianitateak eskaintzen dituen sorpresa atseginak –eta, batzuetan, ez hain atseginak–. Paseoaz, siestaz, ardoaz ari zaizkigu testu batzuk, hilerrietako bisita, edertasun, inskripzioez beste batzuk, Mitteleuropaz, Mediterraneoaz, noski Frantziaz, eta ia-ia pertsonaia balira bezala azaltzen dira Annie Ernaux, Chantal Akerman, Antoine Compagnon edota MZ; eta, besteren gainetik, haiek sortutako obrak.
Jatorrian prentsarako zutabe, biziberrituta agertzen dira Humanitatearen une gorenak liburua osatzen duten testuak, edizio lan zorrotz bati esker; modu horretan, pieza solte zirenak, haien arteko elkarrizketan ari zaizkigu hemen, barne korronte sendoez zeharkatuak, osotasunean. Eta azken emaitza, hartara, saiakera literario askotariko bat da, Michel de Montaignek ireki zuen bidetik, idazlearen kezka itxuraz hutsalak, eta era berean erabat unibertsalak, modu pertsonalean ekartzen dituena.
Related to Humanitatearen une gorenak
Titles in the series (6)
Natura gure esku Rating: 0 out of 5 stars0 ratingsHumanitatearen une gorenak Rating: 0 out of 5 stars0 ratingsUra saltoka: Natura eta kultura jolasean Rating: 0 out of 5 stars0 ratingsEuskara orain: Eraginkortasuna helburu Rating: 0 out of 5 stars0 ratingsNerabeen garrasia: Osasun mentala aldaketa garaian Rating: 0 out of 5 stars0 ratingsEguraldiaren euskara: Aro-bidaia Euskal Herrian barrena Rating: 0 out of 5 stars0 ratings
Related ebooks
Obabatiko tranbia: Zenbait gogoeta azken aldiko euskal literaturaz. 1989-2001 Rating: 0 out of 5 stars0 ratingsSamuel eta Slawo Rating: 0 out of 5 stars0 ratingsItzuliz usu begiak Rating: 0 out of 5 stars0 ratingsHollywood eta biok Rating: 0 out of 5 stars0 ratingsOtto Pette Rating: 0 out of 5 stars0 ratingsIhes ederra Rating: 0 out of 5 stars0 ratingsGoiko kale Rating: 0 out of 5 stars0 ratingsSurf Rating: 0 out of 5 stars0 ratingsBertute txikiak Rating: 0 out of 5 stars0 ratingsEskarmentuaren paperak Rating: 0 out of 5 stars0 ratingsGertakarien urtzea Rating: 0 out of 5 stars0 ratingsVendetta eta beste ipuin batzuk Rating: 0 out of 5 stars0 ratingsXabier Lete: Aberriaren poeta kantaria Rating: 0 out of 5 stars0 ratingsPuta Rating: 0 out of 5 stars0 ratingsGu, nafarrok Rating: 0 out of 5 stars0 ratingsDesterratuen piztiarioa Rating: 0 out of 5 stars0 ratingsAldaira urdinak Rating: 0 out of 5 stars0 ratingsEtxepare porno: Zibernetika euskalduntzeko metodoa Rating: 0 out of 5 stars0 ratingsBarrikadak Rating: 0 out of 5 stars0 ratingsNoiz arte arrazoi Rating: 0 out of 5 stars0 ratingsMendiko behatokia Rating: 0 out of 5 stars0 ratingsT (Tragediaren poza) Rating: 0 out of 5 stars0 ratingsDesertuan behatxuloa Rating: 0 out of 5 stars0 ratingsEuskararen etxea Rating: 0 out of 5 stars0 ratingsItoko dira berriak Rating: 0 out of 5 stars0 ratingsJoan zaretenean Rating: 0 out of 5 stars0 ratingsAurkari ikusezina Rating: 0 out of 5 stars0 ratingsEuskara batuaren ajeak Rating: 0 out of 5 stars0 ratingsSano erradikal Rating: 0 out of 5 stars0 ratingsJeans-ak hozkailuan Rating: 0 out of 5 stars0 ratings
Reviews for Humanitatearen une gorenak
0 ratings0 reviews
Book preview
Humanitatearen une gorenak - Aritz Galarraga
Aurkibidea
HITZAURREA
2019-2020
UDA BAT
100 METRO WALLAPOPEN
EZ ZAIT JENDEA GUSTATZEN
ITSAS MENDI
BIRIATU, LAPURDI
35 URTEETATIK AURRERA
LAXE VS. VALLÍN
GIZABEREAZ
IRAULTZA MODERNOAK
ZIENTZIARI
HAUTESKUNDEAK
LURRIKARAK
HARITZA
FLEMING
BIDAIATZEAZ
ZALDIA
IGERILARIEN GORPUTZAK
LAGUN
H.
HIZKUNTZA SUERTE BAT
HURA BAITZEN
ERROMATAR
PRINTZESA HIRIA
IZURRIA
ISILTASUNAZ
BALKOIAK
LASAIGABETASUNA
PAIDOKRAZIA
DANUBIO
LASTERKA
NAHIAGO EZ
ZAHARRAK
NORMALTASUN BERRIA
AGUR UNIBERTSITATEARI
BIBLIOTEKA BAT
TABUAK
PRAGA
15 MINUTU
BARNE KOLONIALISMOA
BOZKALEKU BATEN AGORTZE SAIAKERA
HIZKI BATEN BEREBIZIKOTASUNA
CBA
2020-2021
INOIZKO UDARIK EDERRENA
BRONTË
40 URTEAK BAINO LEHEN
LEFEBVRE-ENEA
VITA ACTIVA
GELA BAT NORBERARENA
BIZIMODU BIKOITZA
DURAS GARA
MATRIMONIOAREN ALDE
ESPAINOL
FEDE HANDIAGOA
BARATZE BAT
KANDIDO
PASEOA
ODA BAT MASKARARI
LANAK EGINGO GAITU LIBRE
ALFERRIKAKOAREN KONKISTA
BIZITZA DESKRIBATZEN DU
LITERATURA, ZERTARAKO?
MAISU-MAISTRAK
BIGARREN MAILAKO ERREPIDEAK
SALÍSTARRAK
AKITANIERA
ORAINA BESTERIK
EISNERIN
FAMILIA BAT BRUSELAN
NEKEAZ
BESTE ESPAINIA BAT
BIDASOAN BEHERA
DOLUA
BIZILAGUN ONAK
BEGIAK
HILERRI TURISMOA
GERO ARTE
KOMENTARIORIK GABE
MASKULINITATE TOXIKOA
OROIMENTSUA
AI, ARDOA
OIASSO FE
DENA EZ DA IZANGO LARRUA JOTZEA
BIDAIARI ETXEZALEA
LIBURUEN SUIZIDIOA
2021-2022
MUNDUAN PARTE HARTU
ZENBAT ARGI
HIL AURRETIK
DIRUA
LORIK EZ
SIESTA
EGUNEROKOA
GAUZA INUTILAK
CICINDELA JUENGERI
MUGA
HIZKUNTZA LITERARIOA
C’EST TRÈS JOLI
ALDE EGITEKO
AHANZTURA
GARENNEKO BIDEA
ADAN ETA COVID-19A
VIR BONUS DICENDI PERITUS
SAFORENAK
MAITASUNAREN GORAZARRE
MUNDU ZAHARRA BERRITZEA
KAFETEGIA
EZ DUT MAITE GERRA
VALÉRYREN EUROPA
ALDERANTZIZ IRAKURRI
ITSASO GUZTIAK
BEGIAREN HIRIA
FAXISMO LILURAGARRIA
EXISTITZEN DIRELA
PROUST GALDETEGIA
LITERATURA FEMENINOA?
EHIZTARI-BILTZAILEAK
BASORATZEA
MAITE ZAITUT, HIRI DOILORRA!
BIZITZAREN LABURTASUNAZ
BETIEREKO ITZULERA
KONPLIKATUA DA
KAIN-KONPLEXUA
SATORRAREN LANA
HARRIDURA-MARKAK
ZERENGANDIK IHES
ZIZERONENA
BIBLIOGRAFIA
AURKIBIDE ANALITIKOA
V
humanitatearen une gorenak
HITZAURREA
Planak batzuetan aldatu egiten dira, eta aurretik pentsatutakoak baino leku interesgarriagoetara eramaten gaituzte. Aritz Galarraga 2019an hasi zen Argia-n astero «Humanitatearen une gorenak» izeneko artikulua idazten. Autorearen marka nabarmena zeukan zutabe bat aldizkariko aktualitate bizieneko orrialdeen erdian: oasi txiki bat, paperetan egunerokotasun gordinaz gain bestelako arnasa ere bilatzen duten irakurleentzat.
Baina astez aste eta begirada luzexeagoarekin sail hori irakurri dugunok sumatu dugu testu horiek bihurtzen joan direla bestelako zerbait ere. Kosta egiten zait sailkatzea metamorfosi horren emaitza: dietario moduko bat bilakatu ziren puntu batetik aurrera? Irakurle porrokatu baten egunerokoa? Liburutegi unibertsaleko apalen artean ontsa nabigatzeko kaiera? Beharbada saiakera literario gisa definitzea izango da irtenbide eraginkorrena, genero aski zabala baita Galarragak idatzitakoaren ugaritasuna bere osoan besarkatzeko. Eta gainera, Michel de Montaigneren Entseiuak hainbestetan aipatzen duen idazle baten kasuan, tradizio horrekiko lotura nahiko agerikoa da.
Edonola ere, behin onartuta testuok bazirela zutabe arruntez haragoko zerbait, beste premia batzuk sortu ziren. Lehenbizikoa: zazpi egunetik behin iristen zitzaizkigun atal horiek elkartzea, uztartzea, doitzea, irakurleek jaso dezaten bihurtu den hori bezala; liburu bat, alegia. Bigarrena: entrega-orduen presiopean idatzitako hitz bakoitzari, behin horrelako estutasunetatik askatuta, pisu eta bolumen ahalik eta zehatzena ematen saiatzea zizel-kolpe batzuen bitartez. Eta hirugarrena: hitzaurre hau idaztea, Galarraga oraindik irakurri ez dutenek gutxi gorabeherako ideia bat osa dezaten liburu honetako orrialdeetan aurkituko dutenaz.
Eta aurkituko dute, beste ezer baino lehen, irakurle oso eskuzabal bat, leitzen duenarekin bezainbeste gozatzen duena irakurketa horietaz besteekin hitz egiten. Liburuak irakurtzeko gogoa ematen duen liburua baituzu hau, eramango zaituena, kasik oharkabean, Mitteleuropa zeharkatzera titulua inspiratu duen Stefan Zweigen lanetatik hasita Agota Kristofenetaraino; Elias Canettiren mihi askeaz bezainbeste arituko zaizuna Hannah Arendten mundutik apartatzeko beharraz; Marie Darrieussecq, Annie Ernaux, Marguerite Duras edo Antoine Compagnonen lanak zeharkatuz erakutsiko dizuna egileak nolako kariñoa dion frantsesez idatzitako literaturari; baita Mediterraneoari ere, Saforen garaikotik Rafael Chirbesek deskribatutakoraino.
Material horiekin osatuta egon arren, Humanitatearen une gorenak edonork irakurtzeko moduko lana da, literatura jasoena orrialde hauetan gurutzatzen delako pertsona arruntenaren eguneroko bizipenekin, arazoekin eta galderekin. Bizi dugun garaia ahaztu gabe: 2020ko konfinamendua, 2022ko gerra, tartean izan diren hauteskundeak –badakizue, gerra egiteko beste modu hori–... XXI. mendeko bigarren hamarkadaraino iritsi denari ezagunak egingo zaizkio kontu hauetako batzuk, dudarik gabe. Baina literaturan, jakina denez, zer bezain inportantea da –inportanteagoa ez bada– nola; eta alde horretatik, Galarragak darabilen estiloa, liburu hau hain berezi egiten duena, urrun dago ia dena inbaditzen ari den zaratatik eta histerismotik.
Kuxidade honi lasaitasun pixka batekin begiratzen dio idazleak. Kafetegi batetik, tabernako barratik baino gehiago. Eta hain berezkoa duen ironiari uko egin gabe, eskaini digu humanitateari –edo haren zati bati behintzat– begiratzeko modu bat, partikularra, bere-berea, guztia nola den esaten dizun maisuaren begiradaren aldean hain diferentea; eta, aldi berean, dagoentxo hau bere horretan irensten duten legioetatik ere desertatzen duena. Ez maisu, ez morroi beraz: Étienne de La Boétiek bi jarrera horien arteko tarte estuan ikusten zuen libertaterako bidea. Liburu hau lagun ona duzu xenda horretatik ibiltzeko.
Gorka Bereziartua
2019-2020
UDA BAT
Frantzia aldean bada, nola esan, gertakizun bat, lehenik dena irratsaio, hartzeko gero liburu forma. Un été avec izena du, orokorki, eta urtero eskaintzen diote pertsonalitate bati (orain arteko guztiak izan dira gizonezko, puntu negatiboa). Espainia aldean garai batean uda Ana Obregónen hondartzako irudiekin hasten zen bezala, nire uda partikularra ez da hasten urteko Un été avec liburua erosten dudan arte. Aurtengo uda pasa dut, modu horretan, Paul Valéryrekin –«Je hume ici ma future fumée, / Et le ciel chante à l’âme consumée / Le changement des rives en rumeur»–. Momentuz, ordea, nire udarik maiteena jarraitzen du izaten Montaignerekin pasa nuen hura. Besteak beste, nire kontzientziari uzten diolako atzeratzen haren entseiu osoen irakurketa.
Bestela, halako gauzengatik ez balitz, uda ez baitut bereziki atsegin. Are uda bukatzeko desiatzen egoten naiz maiz. Ez hainbeste uda urtaro gisa, nork ez du eskertzen eguzki pixka bat azalean, itsasoko brisa pixka bat aurpegian, izozki pixka bat alkandora estreinatu berrian. Baina bai ofiziala, abuztua, norabait joan behar, zerbait egin behar, guapo egon behar horrekin (gertatzen zaigun guztia merezi dugu, eta gehiago). Sakonago jarrita, pentsatu nahi dut hurrengo uda noiz iritsiko den desiatzen hasteko desio dudala uda hau bukatzea. Gauza jakina baita desioa beti errealitatea baino askoz ere gauza biziagoa dela.
Tarteka sorpresaren bat: hasten duzu uda, gogo handirik gabe, nagi ez gutxirekin, uda bat gehiago balitz bezala. Eta, bizitza zer den, bukatzen duzu lerrootan, testuok idazten, Santi Leoné maitearen hutsunea bete nahian (eta noski bete ezinean). Denbora puska bat pasako dugu elkarrekin hartara (nik uste azkenerako kariñoa hartuko diogula elkarri). Denbora puska bat, humanitatearen une gorenekin.
100 METRO WALLAPOPEN
Kaixo, Aritz izena dut, eta Wallapop aplikazioaren erabiltzaile nauzue. Tira, ez agian terapia hartu behar izateraino, baina maiz samar erabiltzen dudala aitor dezaket. Adikzio bat baitut: liburuzalea naiz. Liburutegiak maite ditut, noski. Liburuak erosteak igotzen dit glukosa, ordea. Egiten dut sarri liburu-dendetan –VIP txartela eman zidaten auzokoan–. Badira, aldiz, eskuratzen zail diren liburuak. Eta, zer nahi duzue esatea, sarean zehar aurki daitezkeen atarien erraztasuna alboratuta, nahiago izaten dut Wallapop bezalako aplikazio batek eskaintzen didan aukera, ez esateagatik abentura.
Modu horretan eskuratu baitut ez bat ez bi harribitxi: deskatalogatuta zegoen ale aurkiezinen bat, saltzaile espezializatuek bost aldiz garestiago saltzen zuten edizioren bat, ia berria izan arren dendetako prezioaren laurdenean oparitzen zuten nobedaderen bat. Eta badakit sekretu hau konfesatuta orain denok ero moduan Wallapopen bilatzen hasteko arriskua dagoela. Baina errealista izanik, nori interesatzen zaio negozio klase hau?
Aplikaziotik eskuratu dudan azken liburua izan da Ramon Saizarbitoriaren 100 metro, lehen edizio bat, bi euro ziztrinean. Kontatuko dizuet nola. Kontaktua egin dut saltzailearekin, Jose izen faltsua erabilita. Ez nau harritu trukea egiteko aukeratu duen lekuak, Donostiako Konstituzio plaza. Gehiago orduak, goizeko zortzietan. Hantxe nago, puntual. Halako batean, atzean pauso hots lehorrak. Badaezpada, Aiuntamentua eskuin aldera utziz, Zamudioren terrazarantz zuzentzen ditut pausoak. «Para o te aso, cabrón». Nire susmoak konfirmatzen dira metro pare bat atzetik tipo bat korrika ikusten dudanean. Orduan, hots berri bat dator soinuen ekilibrioa haustera. Sabelean jasotzen dut espero nuen tiroa. Badakit hilda nagoela. Sei segundo. Denbora eman dit saltzailea ebaluatzeko. Bost izarrekin, noski.
EZ ZAIT JENDEA GUSTATZEN
Horrela, oro har. Kolektibo gisa. Salbuespenekin, noski. Badira jasangarri zaizkidan gizabanakoak, are maite ditudan gutxi batzuk ere. Izango da agian nahasmenduren bat. Kontua da nahiago izaten dudala etxean geratu, adibidez sofan, kanpoalde gordinera atera baino. Batzuetan, baiki, ateratzen naiz, atera behar izaten dut, besterik ez bada patata zurituaren kolorea ken dakidan. Eta horrelakoetan banku batera joan ohi naiz, liburutegi publiko eta aldi berean pribatu ere baden banku bat.
Ondo. Nire bizitza zergatik kontatzen dizuedan: bada, banku horretara joan nintzen azken aldian oso fuerte flipatu nuelako. Nahi gabe, akaso liburuak ez ninduelako katigatu, engantxatu egin nintzen jendearen solasaldietara. Adibidez, bizikletaz pasa zen bikote bati zera harrapatu nion: «Zakil batek zakil usaina du, alu batek alu usaina duen bezala». Beste bikote bat, zoritxarrez, luzeago geratu zitzaidan ondoan. Azkenaldiko mediku bisita guztiak errepasatu zituen batek. Diagnosia bakarrik aipatuko dizuet, xehetasunak aurrezteko: uzki urraketa. Geroxeago, tipo batek ez dakit noren semeari infartu bat eman ziola jakinarazi zigun –bai, ordurako niri ere bai–. Eta semeari eman ziola izan zen hor kezkagarriena, halako gauzak gurasoari ematea dagokiolako, lege naturalak hala aginduta. Zorionez hizketakideak argitu zuen ez zela infartu bat izan, bularreko angina bat bakarrik. Lasaitu nintzen.
Hala ere, eguneko solas guztietan durduzagarriena: aurrez aurre bi gizon, egunonak eman eta batek galdetzen dio besteari: «Ez duzu beldurrik?». Horrela, boteprontoan, batere baselinarik gabe. Bestearen aurpegia ez nuen ikusi, ez nuen ikusi nahi izan, baina irudikatzera iritsi nintzen, galderari zer erantzun zion entzunda: «Zeri?». Nik ere beldur ezezagun bat sentitu nuen, handia, inoiz ez bezalakoa. Eta ez, ez zait jendea gustatzen. Horrela, oro har. Domaia da, ze gauza onak idatziko nituzkeen bestela.
ITSAS MENDI
Pasa berri den –snif– udako une gorenetako bat, gorena ez bada: Isabelle Huppert Urruñan egon da. Berriz esango dut, notiziak despistatu xamar harrapatu bazaitu: Isabelle Huppert, Europako aktore nagusienetako bat, nagusiena ez bada, Urruña herriko Itsas Mendi zinema aretoan egon da. Bai, badakit, orain errabia ematen dizu aurretik jakin ez izana, bertan egon ez izana; baina horretarako gaude idazleok, eguna izorratzeko. Huppert Urruñan, beraz: azken filmetako bat, azkena ez bada –Frankie, beste munduko ezer ez–, aurrez estreinatuko zutela jakin eta hantxe agertuko zela iragarri zuen. Ondorioa: aretoa lepo beteta, eta sekulako oparia bertaratu ginenontzat.
Pasa berri den –snif– udako une horrek gogorarazi dit beste une goren bat, duela urte gutxi batzuk hemendik kilometro ez askotara gertatutakoa. Galiziako Compostelan, Numax zinema aretoak ateak ireki zituen (liburu-denda ere bada; inoiz handik bazabiltzate, ez galdu), eta Nubes pasaxeiras filmaren zuzendaria, Aki Kaurismaki –Europako zinema zuzendari handiena, orain bai, zalantzarik gabe–, emanaldian agertu zen. Errabia eman zidan, noski, bertan egon ez izana. Eta inbidia, ez inolaz ere sanoa.
Baina inbidiaz baino, beste gauza batzuez