HY WOU kinders laat lag – niks meer nie, niks minder nie. Dis wat Joe Brumm, ’n Australiese animasiekunstenaar, met sy trefferreeks Bluey beoog het.
As jy kyk hoe gewild dié klein blou hondjie wêreldwyd geword het, is dit duidelik hy het per ongeluk baie meer reggekry.
Kleuters, ouers, tieners, ooms en tannies verslind die heilsame avonture van die Heeler-hondjiegesin. Hulle is Aussieskaaphonde, oftewel “blue heelers”.
Die sewejarige Bluey en haar vierjarige sussie, Bingo, bly saam met ma, Chilli, en pa, Bandit. Bandit is ’n argeoloog, dit wil sê hy grawe bene op, en Chilli is ’n snuffelhond by ’n lughawe.
