BIEF-EN-SALAMI-KAASBURGERS
’n Skeppie soet tamatieblatjang maak dié outjies nog lekkerder!
Genoeg vir 4 • Voorbereiding: 20 minute • Gaarmaaktyd: 8 minute
• 600 g beesmaalvleis
• 100 g salamiskyfies, fyngekap
• 125 ml droë broodkrummels (ons het panko gebruik)
• 60 ml fyngerasperde parmesaankaas
• ’n paar takkies vars origanum, blaartjies gestroop
• 1 eier
• 45 ml grofgemaalde swartpeper (opsioneel)
• olyfolie vir vlakbraai
• 4 skyfies cheddarkaas
• 4 groot sesam- of brioche-rolletjies, gerooster
• mayonnaise, vars tamatieskyfies, blaarslaai, agurkieskyfies en tamatieblatjang om voor te sit
1 Meng die maalvleis, salami, broodkrummels, parmesaan, origanum en eier. Geur die mengsel liggies met sout (onthou, die salami en parmesaan is reeds sout) en vorm dit in 4 ewe groot vleiskoekies net groter as jou broodjies. Rol die rand van elke vleiskoekie in die grofgemaalde peper – maak seker dit sit mooi vas.
2 Verhit ’n pan tot warm. Giet ’n skeut olie in die warm pan en braai die vleiskoekies vir ’n paar minute aan die een kant. Loer, maar moenie omdraai voor dit ’n lekker kors gevorm het nie. Draai om en braai die koekies verder tot die ander kant ook ’n mooi kors het. Draai die hitte laer, plaas ’n skyfie kaas op elke vleiskoekie en sit die deksel so ’n paar minute lank op die pan sodat die kaas kan smelt en die koekies verder gaar stoom. Dié sappige burgers is heerlik as dit nog ’n effens pienk skynsel aan die binnekant het (soos goeie steak), maar oordeel self. Die gaarmaaktyd gaan afhang van die grootte van die koekies en die hitte van die pan.
3 Bou die burgers deur eers mayonnaise op die geroosterde rolletjies te smeer. Sit dan ’n lagie tamatie, blaarslaai en agurkies op die onderste rolletjiehelfte. Sit ’n vleiskoekie bo-op en skep ’n ruim lepel tamatieblatjang oor voor jy die boonste rolletjiehelfte opsit en weglê.
Stap vir stap
BOLOGNESE OP SY BESTE
Dié resep se algehele gaarmaaktyd is dalk lank, maar die voorbereiding is soos blits en, as jy porsies van die verleidelike sous vries, kan jy ’n fantastiese bolognese binne 20 minute voorsit. Pronto! Hierdie is my weergawe van die Italiaanse ikoon Marcella Hazan se resep – met ’n paar ekstras soos spek, vars kruie en knoffel – proe self.
Genoeg vir 1 kg pastalinte (sowat 12 porsies) • Voorbereiding: 30 minute • Gaarmaaktyd: 3 uur en 20 minute
• 30 ml elk olyfolie en botter
• 1 groot ui, gekap
• 2 vet wortels, gekap
• 2 stingels seldery, gekap
• 2 lourierblare, ’n takkie pietersielie en 3 takkies tiemie
• 1 kg beesmaalvleis
• 500 g varkmaalvleis
• 250 g spek, gekap
• 1 of 2 huisies knoffel (opsioneel)
• 250 ml volroommelk
• ’n goeie skeut gerasperde neutmuskaat
• 250 ml droë wit- of ligte rooiwyn
• 800 g geblikte heel pruimtamaties
• 60 ml tamatiepasta
• gerasperde parmesaankaas om voor te sit
• vars basilieblare (opsioneel)
Waarom heel tamaties?
Heel tamaties is minder verwerk as gekapte tamaties, wat beteken dit behou meer van die natuurlike tamatiegeur en -soetigheid.
Sit die bolognesesous voor
op ’n bed gebotterde pastalinte, met varsgemaalde swartpeper en gerasperde parmesaankaas bo-oor. Vars basilie uit die tuin lyk en smaak vir my heerlik, maar is nog een van daardie ekstra bestanddele wat nie tradisioneel nodig is nie. Laat alternatiewelik die sous heeltemal afkoel en vries in porsies. Ontvries oornag in die yskas voor gebruik.
1 Smelt die olie en botter saam in ’n groot dikboomkastrol, voeg die groente by en braai dit rustig oor matige hitte tot sag en glansend (sowat 5 minute). Voeg die kruie by.
2 Roer die maalvleis en spek by die pot en braai vir ’n paar minute saam tot die vleis begin verbruin. Jy kan die hitte vir hierdie stap verhoog. Breek die vleis deurgaans met ’n spaan in kleiner stukkies. Geur nou mildelik met sout en swartpeper na smaak. As jy hou van knoffel, kan jy nou ’n grofgekapte huisie of twee byvoeg.
3 Roer die melk by en laat prut saam tot die melk so te sê verdwyn het. Roer die neutmuskaat by.
Roer die wyn van jou keuse by en kook weer so te sê droog. Ek vind
