OOR saadjies van hoop kan jy Nicky Jafta net mooi niks vertel nie. Want uit feitlik niks het dié Kapenaar ’n suksesverhaal soos min opgedis.
’n Deel van die tol wat die pandemie van Suid-Afrika geëis het, was 1,5 miljoen werksgeleenthede, en op 56 was Nicky een van daardie mense sonder ’n inkomste.
Hy het die staat se noodtoelae van R350 per maand begin ontvang en sy vrou, Lynette, het darem nog ’n geldjie verdien, maar dit kon nie al die gate toestop nie.
Hoeveel kos kan ’n ou met R350 koop, het hy destyds gewonder. Hoe kan hy die bedraggie rek? En toe begin ’n idee in sy kop ontkiem.
Toe hy nog as motorverkoopsman gewerk het, het hy graag in sy eie tyd in die grond gevroetel,
