Brief uit die buiteland
Hy laat hom nie afskrik deur ’n paar veesiektes en temperature van tot -40 °C nie. Trouens, ’n mens kry die indruk JJ van der Merwe verkies dit as dinge taai raak. Saam met ’n grondige kennis van veegesondheid en -hantering, en ervaring as vragmotorbestuurder, is dit hierdie ingesteldheid wat JJ ’n aanwins maak vir sy Amerikaanse werkgewer, Jim Aschoff van Aschoff Farms by Plainview, Nebraska.
Vertel ons van die boerdery en die omgewing waar jy werk.
Aschoff Farms voer sowat 6 000 kalwers – swart en rooi Angusse, of black steers soos hulle hier genoem word. In die winter daal die kwik soms tot -40 ºC. Dit is in hierdie ysige weer dat ek elke oggend opstaan en ál die beeste deurkyk om seker te maak almal is gesond. Selfs Jim staan dikwels verstom oor my vermoë om die koue buitelug te trotseer.
Die Amerikaners gebruik ’n cow catcher, ’n vanghok wat voor op ’n laaigraaf gemonteer is, om individuele siek beeste in voerkrale te vang. As ek sien ’n bees lyk nie lekker nie, gaan haal ek die cow catcher om die dier te vang en te behandel.
Die voerkraal is uiters modern. Die vloere is só ontwerp dat diere se mis deurval
