Die storie van Nebukatneser is nie sommer enige katstorie nie. Dit is die verhaal van ’n waarlik wilde diertjie se verwoede veggees en haar aanvaarding van ’n lewe saam met mense, en dan die merkwaardige geduld en vindingrykheid van haar aanneemma, Marian van Wyk van Seepunt, Kaapstad, en deesdae ook Plettenbergbaai.
In Platteland se Winter 2017-uitgawe (#15) het Marian vertel hoe sy gedurende ’n haarafspraak met ’n kop vol foeliestroke op die piepklein diertjie afgekom het: Wild soos die nag, toegebou in ’n Seepuntse steeg. Alleen en verskrik, skreeuend honger, omring deur slegs bourommel, vuil water en duisternis.
Marian en haar man, Louis Botma, het nie beplan om die diertjie aan te neem nie. Hulle woon immers op die sewende verdieping van ’n woonstelgebou in die stad en het lankal vrede gemaak met hulle troeteldierelose bestaan – en vir katte het Louis in elke geval nie juis ooghare gehad nie. Buitendien laat wilde katte hulle nie sommer aanneem nie.
Maar ’n paar gelukskote – ’n veearts wat ’n greintjie hoop gesien het, die!”