WEINIG is te sien van die jare se worsteling, verslawing en swaarkry.
Vandag is dinge mooi. Haar glimlag is warm en ontspanne toe sy die hekkie na haar kothuis op die stranddorp Langebaan oopstoot om ons binne te nooi. Die geur van koffie vul die oopplansitkamer-en-kombuis. Op die kombuistafel staan ’n bos gemengde lelies in die wintersonnetjie.
Lindie Stander (47) gaan op die gemakstoel sit en strek haar bene behaaglik uit. Sy sit haar voete op die koffietafel. Haar klein bruin brakkie, Eddie, spring dadelik op haar skoot.
Nie alles aan haar is nuut nie. Haar kort, bruin hare staan steeds kenmerkend in alle rigtings, soos kykers haar jare gelede in leer ken het. Maar haar ligblou kraaghemp en bruin broek sit gemaklik