INSPIRASIE
Die kosreuke kom haal jou al soos jy instap, en jy weet sommer: in dié huis word daar lekker geëet!
Charlotte Willemse (51) groet ons met ’n breë glimlag en nooi ons in. Hier, in haar kombuis in die Strand buite Kaapstad, woel dié ma van vier elke Dinsdagoggend met twee helpers om potte kos te kook en kospakkies aan haar gemeenskap uit te deel. Dit gaan al drie jaar só, en die aantal mense wat elke week inloer vir ’n bakkie kos raak net ál meer, sê Charlotte. Vir sommige is dit hul enigste ordentlike maaltyd vir die week.
Dis egter nie net haar uitreikwerk wat Charlotte bekend maak in haar buurt nie.
DAMIAN SIEN DIE NOOD
Haar jongste seun, die Springbok en Stormer Damian Willemse, is die eintlike celeb in die gesin. Damian het die hele land laat gees vang met sy feesvieringe op sosiale media ná die Bokke se onlangse Wêreldbekerwen. En met reg: Twee goue Wêreldbekermedaljes – op ‘n bloedjonge 25 jaar oud – móét mos gevier word.
