DIT was soos ’n romantiese fliek wat oornag in ’n riller ontaard het.
Eers ’n vriendskap wat versigtig-versigtig iets meer word, boodskappe waarin liefde betuig word – en toe, meteens, ’n dwelmnes, ’n klopjag, alkoholmisbruik, dreigemente en agtervolging.
Nou het Ashleigh Ogle (33) besluit om haar stilte oor haar verhouding met die rugbyspeler Elton Jantjies (33) te verbreek.
Sy is deur hel, maar dis ’n stil Ashleigh wat in Media24 se kantoor voor ons sit.
Sy was eers huiwerig om met ons te praat – sy sê sy leef reeds weke lank in vrees.
“Ek het op 19 Oktober uitgevind Elton het my laat agtervolg,” vertel Ashleigh.
Voor haar op die tafel lê sjokolade, salami-en-kaashappies en samoesas, maar dis asof sy hulle nie raaksien nie omdat sy haar storie wil deel voor sy moed verloor.
Sy ken Elton al so 13, 14 jaar. ’n Vriend het hulle nog aan mekaar voorgestel.
Elton het geweet Ashleigh was in ’n verhouding, en het dit glo gerespekteer. Hulle was bloot vriende wat deur die jare kontak met mekaar behou het.
“Hy was altyd die een wat na my toe uitgereik het om te vra hoe dit gaan. Ek het nooit eerste uitgereik nie. Ons het deur die jare baiekeer saam gaan uiteet. Maar net as vriende omdat ek ander mense respekteer.”
Hy was immers getroud met Iva Ristic, en hy was die pa van klein kindertjies.
Sy beduie met ’n halwe samoesa in die hand terwyl sy vertel sy het geweet Elton was getroud en het daarom altyd haar
