WIE HET HIER TUINGEMAAK? Annemarié Meyer
WAAR George GROOTTE 1,2 ha
GRONDTIPE Swart leemgrond
OUDERDOM VAN TUIN 40 jaar
Ná 40 jaar waarin sy haar paradystuin op die plaas Uitsig aan die voet van die Outeniekwaberge versorg het, moes Annemarié Meyer haar 1 200 roosbome groet. “Dit was aanvanklik vir my moeilik om met ons aftrede van Uitsig afskeid te neem omdat my man en kinders se wortels daar is en dit vir 40 jaar ons tuiste was. Maar as ek nou daaraan terugdink, besef ek die swaarste was om vir my tuin tot siens te sê en my rooskinders te groet,” gesels Annemarié.
“Ek het my voorgeneem om by ons nuwe woonplek, ook op ’n plaas hier naby George, nie weer rose in oormaat te kweek nie. My suster Sandra en ’n paar vriendinne het ’n weddenskap met my aangegaan en gesê kom ons kyk hoeveel is daar oor ’n jaar. Nodeloos om te sê, ek het die weddenskap verloor,” vertel sy. “Eers het ek tien selfgekweekte roosbome geplant en soos in my vorige
