IN KRUGERSDORP aan die Wes-Rand kyk ’n jong seun met groot oë na sy ma, Kezia Mc Alpine. Vergelyk ’n mens hom met foto’s van sy pa, is hy ’n klein ewebeeld. Maar foto’s is die enigste manier waarop dié kind sy pa kan sien.
Kevin Mc Alpine, ’n finansiële makelaar van Krugersdorp, is op 26 Mei 2016 wreed vermoor nadat hy vir ’n werkafspraak opgedaag het.
Hy was maar 29 jaar oud.
Kevin was die tweede laaste van Electus per Deus se 11 slagoffers wat tussen 2012 en 2016 vermoor is.
Die baasbrein, Cecilia Steyn, Marinda Steyn, Marinda se kinders, Le Roux en Marcel, Zak Valentine asook John Barnard (sien nota onder) sit in die tronk en dien tussen die ses van hulle meer as 1 000 jaar se tronkstraf uit.
Kezia se seuntjie is skaars drie maande ná sy pa se moord gebore. Benewens die verskriklike trauma het Kevin se dood ’n geweldige finansiële impak op haar en haar kind se lewe gehad.
“Ek het dit nie toe (met sy doodstyding) geweet nie, maar agterna uitgevind sy lewenspolis het verval. Die motor waarin hy gevind is, was in my naam en ek moes dit teruggee aan die bank, vir wie ek steeds geld geskuld het,” het Kezia gedurende haar hofgetuienis in 2018 aan adv. Gerrit Roberts SC, die staatsaanklaer, gesê.
Kort voor Kevin se dood het die egpaar beplan dat Kezia, ’n onderwyseres, sou ophou werk ná hul eerste kind se geboorte. Daardie droom was ook aan skerwe. Nou het sy skuld én ’n kind gehad om na om te sien.
“Ek moes vroeër teruggaan werk toe as beplan, en dit is moeilik om ’n kind