Kleinveeman se dood laat leemte
WENBRIEF Die berig “ ‘Ware heer’ van die skaap- en bokhaarbedryf onthou” (LBW, 24 Augustus 2023) het betrekking. Ek wil daarby aansluit.
Ek het grootgeword op ’n plaas by Somerset-Oos. Vandat ek kan onthou, was oom Tom Retief die BKB-omie wat gereeld kom skape en bokke klas het. Hy het altyd saamgegaan as Pa ramme gaan koop het, want hy het presies geweet watter ramme aangekoop moet word.
Met my oupa se skielik afsterwe in Mei 1963 was dit hy wat dadelik die 47 km grondpad aangedurf en die skeerdery kom behartig het. Hy was elke dag daar en het alles verder bestuur totdat die skeersel gebaal en veilig by BKB in Port Elizabeth afgelaai is.
Hy was ’n lang, skraal omie met ’n grys snor waarvan hy die punte gedraai het. Wanneer die skeerders die skape of bokke raakgeskeer het, het hy die plek toegewerk met naald en garing en geneesolie opgegooi.
As kind onthou ek dat hy altyd sommer direk verby die huis al met die laning langs tot by die skaapkraal gery het. Ek was altyd eerste by as
