‘HY WAS KASTIG NOOIT OP DIE PLAAS WANNEER EK DIE TROKKE WOU STUUR NIE OF ONS KON EENVOUDIG NIE BY DIE PLAASHEK INKOM NIE’
DIS ’n idilliese landskap wat die verfkwas van Pierneef kon inspireer. Hier tussen die kliprante van die Witteberge, waar die soel waters van die Kraalrivier deur die valleie van die Oos-Kaapse platteland sny, vind ’n mens Barkly-Oos.
Soos in menige klein dorpie is daar die kerk van sandsteen, ’n koöperasie en ’n hotel.
Maar al blyk die prentjie vreedsaam te wees, is die tonge los en talle inwoners van dié kontrei briesend oor ’n blink boer wat hulle meen hulle met miljoene rande ingeloop het.
“Hy het met die Bybel onder die arm geloop. Glad met die mond en ’n uitgesproke Christen,” vertel ’n bron wat anoniem wil bly.
Die man wat sy dorpsgenote so warm onder die kraag het, is die boer Piet Bekker, wat op die plaas Abbotts Ann, tussen Lady Grey en Barkly-Oos, boer.
Die stories loop behoorlik oor dié boer, wat volgens sy kontreigenote ’n klomp mense met ’n beleggingskema ingedoen het en volgens hulle groot geld aan sy beleggers skuld.
Van die mense wat na bewering deur hom ingeloop is, vertel hul aftreeplanne is nou in hul maai.
Volgens ’n bron het Piet beleggers genader en vir hulle
