VAN haar sitkamervenster af sien ’n mens die landskap van ’n afgesonderde stuk wildernis. Maar wanneer sy deesdae na die woud hier in die Kuleni Game Park kyk, bring dit by haar herinneringe van iets anders: wrede tonele van ’n gewelddadige aanval wat haar lyf én haar lewe stukkend gelaat het.
Die voorval speel oor en oor deur Nicole Panos se gedagtes. Sy kan nie anders as om skuldig te voel nie. Is daar iets wat sy kon gedoen het om te verhoed dat ’n kameelperd haar en haar kinders aanval? As sy net daardie dag ’n ander roete deur die bos gevolg het, het haar dogtertjie dalk nou nog gelewe en was sy nie in haar onderlyf verlam nie.