Hiking Trails of South Africa
Deur Willie Olivier, Struik Nature R340 in boekwinkels
Soos met alles anders soek ons deesdae ook aanlyn na staproetes. Maar nie alle roetes is op die internet nie, en party se webtuistes is nie gebruikersvriendelik nie. Dis wat hierdie gidsboek so kosbaar maak: Dis die volledigste bundel van plaaslike staproetes wat ’n mens kan kry! Dit bevat meer as 500 dag-, naweek- en meerdagroetes om van te kies – insluitend 60 nuwe roetes.
Dis die vyfde uitgawe van die gids en aan die struktuur is daar nie veel gekarring nie. Die indeks wat altyd voorheen agterin die boek was, is wel weggelaat. Wat ’n jammerte! Om nou ’n roete na te slaan moet ’n mens reeds weet in watter streek dit lê, waar jy voorheen net met ’n vingerpunt deur die alfabetiese lys kon snuffel. Afgesien daarvan is die boek baie prakties.
Olivier het Suid-Afrika in sewe geografiese streke verdeel en elke afdeling word ingelui deur ’n ordentlike kaart waarop ’n mens presies kan sien waar elke staproete in dié gebied lê. Die genommerde roete-inskrywings het elkeen ’n opsomming van die nodigste inligting: Die naaste dorp, die afstand en