‘DIE BESLUITE WAT GENEEM WORD, IS OP DIE OU END GLAD NIE IN BELANG VAN DIE DIERE NIE’
PHIL Demers se prokureur het hom eenkeer ’n streng waarskuwing gegee: Hy moes nie sy megafoon gebruik as hy buite Marineland naby die stad Niagara Falls, Ontario, betoog nie. As hy dit wel sou doen, kon die park – wat reeds besig was om hom te dagvaar – verdere regstappe doen.
Hy het nie geluister nie.
Op 18 Mei 2019 het hy die strate ingevaar en tussen ’n horde betogers teen ’n leer opgeklim met ’n megafoon in die hand. Die park sou hom of enigiemand anders nooit stilmaak nie, het hy geskree.
Phil glimlag breed wanneer hy oor die dag praat. “Ek het dit nie vir hom maklik gemaak nie,” sê hy oor sy prokureur.
Vyf jaar tevore, in Maart 2013, het Marineland ’n eis van 1,5 miljoen Kanadese dollar (R14 miljoen) teen Phil ingestel. Hy het 12 jaar lank as afrigter by die park gewerk en die vorige jaar bedank toe hy keelvol geraak het van die lyding wat hy daar onder die diere aanskou het.
Maar Marineland het hom nie vir laster gedagvaar soos sy prokureur gevrees het nie. Hulle het hom aangekla van betreding en sameswering om een van hul swaarste inwoners te steel: ’n walrus van 550 kg met die naam Smooshi, met wie Phil ’n hegte band gevorm het.
Destyds het Phil gesê die park se be-werings teen hom was suiwer versinsel.
“Ek kon maar net lag,” sê hy nou.
Binne ’n maand het hy ’n teeneis vir naamskending en misbruik