TWEEDE KANS
Laggende kinders begroet jou by die Somerset-Wes Family Shelter en die atmosfeer is van so 'n aard dat jy dadelik omring word deur die feestelikheid wat dig oor die shelter hang. Maar dan kry jy eensklaps 'n knop in jou keel as jy by een van die kamers instap en die jong man sien wat vir die afgelope twee jaar by dié shelter tuis is nadat 'n nare motorongeluk sy lewe onherroeplik verander het.
En nou is sy eens onafhanklike gees ook saam met sy liggaam aan 'n rolstoel vasgekluister nadat die ongeluk hom gedeeltelik verlam gelaat het. Maar steeds bly Lee-Roy Juries (36) oorspronklik van Macassar buite Kaapstad glo hy sal eendag wéér op sy eie twee bene kan staan.
Aanvanklik vertel Lee-Roy se oë 'n storie van 'n teruggetrokke man van min woorde totdat hy gemaklik raak en dan geleidelik uit sy dop begin kruip. En wanneer hy eers begin praat, is daar geen keer aan hom nie.
“Die voorste twee wiele van die bakkie was alreeds oor my. En omdat ek op my sy gelê het, was daar iets onder die bakkie wat my saam met die bakkie gesleep het.”
LEE-ROY JURIES
Hy probeer 'n prentjie skilder van sy komvandaan. "Ek is een van vyf siblings. Ons
