POFADDER-MOORD: SURETHA SE BRIEF AAN HG UIT DIE TRONK
IN HAAR tronksel op Upington, waar sy al agt maande verhoorafwagtend is weens die huurmoord op haar man, neem Suretha Brits ’n pen en begin skryf: “Ek het die grootste fout van my lewe gemaak om die reg in my eie hande te neem…”
En so begin die aanloop tot ’n dramatiese wending in die Pofadder-moordsaak.
Weg van die fel kollig van openbare oordeel bieg die aantreklike brunet (31): Ja, sy hét haar man, die hoteleienaar Leon Brits (41), laat vermoor. Maar dis meer as net ’n skuldbekentenis. Want in haar netjiese, kursiewe handskrif vertel Suretha die verhaal van ’n minderjarige meisie in ’n seksuele verhouding met ’n volwasse en gesiene dorpenaar.
Haar bewerings sluit ’n tienerswangerskap en gedwonge aborsie in, gevolg deur ’n huwelik van geweld en doodsdreigemente agter geslote deure.
Dít terwyl ’n intieme plattelandse gemeenskap glo niks sien nie…
Dis Suretha se eie verhaal – en net dae ná die skryf daarvan het sy haar aanvanklike ontkenning van skuld verander en beken sy dit nou. Op 15
