Scrat, die hiperaktiewe sabeltandeekhoring in die Ice Age-flieks, is mos obsessief oor ’n akker. Jammer, daar het nooit so ’n wese bestaan nie. As jy jouself egter skielik in ’n Ystydperk bevind, kan jy maar jou lewe in gevaar stel vir ’n paar akkers (of enige neut).
Neute is stewige klein pakkies vet, proteïen en vesel. Meeste van die vet is boonop die gesonde, onversadigde soort. Net die ding wat jy nodig het om in ’n yswoestyn (of ’n besige dag) te oorleef.
Gereelde eters van neute was minder geneig om aan kanker of hartsiekte te sterf gedurende ’n Harvardstudie wat oor 30 jaar gestrek het. Eet dus gerus elke dag ’n handjie vol (sowat 30 g) as deel van ’n gesonde dieet.
Gereelde eters van neute sterf minder aan kanker of hartsiekte
HARVARD-STUDIE
VAN WAAR, GEHASI?
Boomneute (soos amandels, Brasiliaanse neute, kasjoe-, hasel-, pekan-, pistasieen okkerneute) groei letterlik aan bome. Grondboontjies (mos peanuts in Engels) groei ondergronds. Botanies is dit nie ’n neut nie, maar ’n peulgewas (dieselfde familie as ertjies en lensies). Vir kulinêre en voedingkundige doeleindes word dit egter meer soos ’n neut gebruik, volgens The Peanut Institute (peanut-institute.com).
GEWIGSVERLIES
Nou ja, as jou idee van gesonde eetgewoontes ’n paar dekades gelede gevorm is, glo jy dalk jy moet neute, wat hoog in kilojoules (kJ) en vet is, vermy. Nie
