’n Gesonde dieet gaan nie oor streng beperkings, om onrealisties maer te wil wees, of om jouself te ontneem van die kos waarvoor jy lief is nie. Dit hoef ook nie ingewikkeld te wees nie. Die hoeksteen daarvan is om verwerkte kosse sover moontlik met die “regtes” te vervang. Eet jou kos so na as moontlik aan die manier hoe die natuur dit gemaak het – en dit kan ’n groot verskil maak aan hoe jy dink, lyk en voel.
1 Vis is koning
Veral olieryke vis (soos salm, sardientjies, makriel en snoek). Dit is ’n gonswoord in die gesondheidsbedryf, grootliks vanweë die “towerbestanddeel” omega 3-vetsure. Dit is essensieel – jou liggaam kan dit nie self vervaardig nie – en belangrik vir amper elke deel en vele funksies van jou liggaam. Ons kry te veel omega 6 in, nog ’n essensiële vetsuur. Bronne is veral margarien en sonneblomolie (daai lekker bord slaptjips!), maar ook die vet van voerkraaldiere wat mielies gevoer word. ’n Wanbalans in die verhouding omega 6:3 blokkeer as’t ware jou liggaam se eie anti-inflammatoriese prosesse – en dus sy vermoë om teen inflammasie te veg. Dit dra by tot talle siektes, onder