BEMAGTIG VIR ’N BARSHOU

WANNEER presies dit gebeur het, kan sy vandag nie meer onthou nie – maande later maak die dag en tyd in elk geval nie saak nie.

Iets het aan haar gemoed gekrap, onthou sy nog. Eintlik weke aanmekaar. En die skielike besef was nes ’n skoot yskoue water in die gesig: Sy het die vrou in die spieël nie meer herken nie – en daar was niks meer van haar oor om te gee nie.

“Ek het nie meer geweet wie ek is nie,” sê die aktrise Angelique Gerber (39) vandag. “Ek was 38 jaar oud en ek het myself nie meer geken nie. En dít was vir my ’n wekroep. Ek wou myself weer vind; ek wou weer seker wees oor wie en wat ek is.”