MARCIEL SE SPROKIESTROUE: NOU IS DIT MÝ BEURT!
WANNEER die boere voor die kameras maat soek, is sý die een wat hulle uitvra en bemoedig; sy lag saam vir hul grappies, pink ’n traan wanneer dinge nie uitwerk nie en jubel saam wanneer iemand liefde vind. Maar nou is dit háár beurt om al skitterend te baai in die gloed van liefde, want weg van die kameras is sy die ster van haar eie liefdesverhaal.
Vandag stap die maatsoekreeks Boer soek ’n vrou se Kupido, die mooie aanbieder Marciel Hopkins (29), sélf in die paadjie na die kansel af. En ’n mooier agtergrond sou geen bruid kon vra nie.
Vanuit die unieke kapel op ’n eilandjie in die Bergrivierdam lyk dit byna asof die Hottentots-Hollandberge laer trek om die La Roche-wynlandgoed buite Franschhoek.
Die aantreklike bruidegom, Handré Lourens (31), staan eers by die ingang en verwelkom die gaste wat in groepies oor ’n bruggie aangestap kom en gaan wag dan voor in die kapel op sy geliefde.
Van senuwees is daar geen sprake nie; hy wag al te lank op hierdie dag.
Dan word die borrelende geselsies in die kapel stil toe ’n swart-en-silwer
