SO KOM ALS OP DIE LAPPE
ELKE kwilt het vir my ’n storie. Met elke blokkie kan ek presies vir jou sê na watter liedjie ek geluister het of watter musical ek opgesit het terwyl ek die appliek gedoen het. Appliek is waar ek die prentjies op die blokkie skep.
Ek het my eerste kwilt in 2003 gemaak. Ons gesin gebruik hom vandag nog. Hy staan bekend as die pers kombers. Dit is ons piekniek-en buitespeel-kombers.
Elkeen van my kwilts het ’n naam. Van die sowat 85 kwilts in my versameling is my gunsteling een wat ek gemaak het by my skoonma, Caroline Heyneke, se huis in Keimoes deur die harde inperkingstyd in 2020. Sy naam is Silly Sunset.
