Kry jou by Koppieskraal
Voor my lê ’n plaat water omsoom deur kort groen gras. Skoorsteenveërs fynkam die vlak kant terwyl ’n horde kolganse, ’n enkele bleshoender en ’n paar kleindobbertjies, insluitend jongetjies, dieper in swem.
Dié waterlandskap vang ’n mens onkant in die middel van die Kalahari. Paul en Riana Loots se plaas, Uitsig, lê 50 km noord van Upington, reg langs die R360. Hier bedryf hulle die Kalahari Guesthouse, Camping & Farmstall.
Ek wou aanvanklik kamp, maar toe vertel Riana my dat hulle ook ’n boskamp het met netjiese tenteenhede. Die opstal (waar die gastehuis en padstal is) lê aan die westekant van die teerpad en die kampplek en boskamp aan die oostekant. Paul het voor met sy quadfiets gery om my te wys waar ek kan slaap. Een oomblik ry jy nog deur tipiese Kalahariveld – driedorings – en dan kom jy om ’n draaitjie en hier lê ’n groot gronddam voor jou. Die dam is nie vol nie, want hoewel Paul-hulle goeie somerreëns gehad het, moet dit selfs meer reën vir die dam om vol te stoot.
Nou is dit kort voor sonsondergang en ek staan met my kamera langs die dam. In die doringbome wat op die wal aan die westekant groei, is ’n swetterjoel rooibekkweleas besig om sitplek te soek vir die nag. Nou en dan vlieg ’n sjorrie kweleas af grond toe om water te drink. Steeds kom die swerms uit die veld gevlieg, en later is dit behoorlik ’n gekwetter. Bontkiewiete se byna metaalagtige kjiep-kjiep-geluide, die kolganse se geroep – dít alles sorg vir ’n skemer vol onverwagte klank en kleur.
Noenieput toe
Ná koffie, springbokbiltong en ’n proe van Riana se tsammakonfyt, groet ek die vriendelike mense van Uitsig en val in die pad. Ek ry eers suid vir 9 km met die R360 voor ek regs
You’re reading a preview, subscribe to read more.
Start your free 30 days