TB JOSHUA: BEDRIEËR OF GESALFDE?
OP DIE tweede dag van TB Joshua se begrafnis klim sy dissipels op die verhoog. ’n Mikrofoon word rondgestuur terwyl meer as 60 dissipels hulself voorstel.
Hulle kom uit 18 lande waaronder Suid-Afrika, Indonesië, Mexiko, Amerika en Brittanje. Party is skaars uit hul tienerjare; ander in hul laat middeljare nadat hulle die Nigeriese miljoenêr- pastoor en selfverklaarde profeet wat in Lagos ter ruste gelê word dekades lank gedien het.
’n Senior Nigeriese dissipel, wat onlangs tot profetes bevorder is, begin met haar huldeblyk. “Hoe beskryf jy iemand so onbeskryflik?” vra sy. “Hoe definieer jy iemand so ondefinieerbaar? Menslik en goddelik?”
Joshua is op 5 Junie 2021, ’n paar dae voor sy 58ste verjaardag, dood. Die nuus het in die sosiale media versprei nog voor die Synagogue, Church of All Nations, bekend as Scoan se amptelike verklaring uitgereik is.
“God het sy dienaar profeet TB Joshua huis toe geneem,” het dit gelui, “soos dit volgens goddelike wil hoort.”
Met sy begrafnis, meer as ’n maand later, is daar nog geen melding van die oorsaak van sy dood gemaak nie.
In ’n stad vol megakerke en charismatiese pastore het TB Joshua se wêreldwye bekendheid hom laat uitstaan. Op sy stadiontoere deur Afrika, Asië en Latyns-Amerika het hy groot skares gelok. Sy satellietkanaal, Emmanuel TV, was ’n teenwoordigheid in talle huishoudings in Afrika suid van die Sahara.
Voor die pandemie was sy kerk die grootste toeristeaantreklikheid in die land. Sowat 15 000 mense het Scoan weekliks besoek.
Party het uit nuuskierigheid gekom; baie uit desperaatheid om hopelik van siekte genees of van bose geeste bevry te word. Politici het gekom in die hoop dat Joshua se seën
