Willem Pretorius is ’n kunstenaar wat gewone, soms onopvallende dinge met olieverf op doek vasvang. En dit is so al asof hy jou wil dwing om die mooi in die alledaagse te sien.
“Pretorius se oogpunt, die plek van waar hy waarneem, is die platteland. Hy is nie ’n stedeling wat soontoe reis vir vinnige besoeke aan klein dorpies nie. Daar is iets aan die skilderye wat eg voel – dis nie ’n buitestander wat die uitsig oor Burgersdorp skilder nie, of die graansilo met die nou geprivatiseerde koöperasie se handelsmerk op nie. Dis hoe hierdie plekke lyk en voel,” skryf Andries Bezuidenhout in die inleiding.
“Willem Pretorius spesialiseer in lig en die kwaliteit van lig. Sy skilderye gaan oor stadig ry, tyd verwyl, nie spandeer nie. Dit gaan oor onthou, soms ’n wêreld wat vir stedelinge verlore is, maar soms ’n tyd wat vir altyd verlore is. Tye toe water in oorvloed geloop het, toe die staat munisipale swembaddens vir klein bevoorregte gemeenskappe in stand gehou het. Nou dryf daar sinkplate in swembaddens wat in onbruik geraak
