Meesterstuk

MINETTE le Roux sit en wag. Bo-oor die dak van die lughawerestaurant dreun die lugreuse, aan’t kom en gaan, maar vlugnommer FR723 uit Parys, Frankryk, is laat.

Sy stoot die tweede leë koffiekoppie weg.

“My Jacques kom vandag!” juig haar hart.

Sy skuif ongeduldig rond en haar oë gly oor die skare wagtendes in die groot restaurant. Dis mense wat maal en wag, party belaai met kameras en jasse in afwagting op ’n groot avontuur. Ander wag net.

Die groot horlosie bokant die uitgang swaai traag sy sekondewyser om en om. Sy lang arm raak-raak aan 14:25. Vlug FR723 moes 14:00 al ingekom het.

“Ek wag al twee jaar lank vir Jacques,” dink sy, “nou’s die vervlakste ding nog laat ook.”

Elke minuut van tweeuur af voel vir haar na ’n ewigheid.

“Aandag alle passasiers…” Hoeveel keer het die blikstem nie al haar