SLYP VIR OULAAS VOOR SKOOL

Jy bou reeds sedert jou kind se geboorte aan die belangrike onderliggende vaardighede vir haar skoolgereedheid en nou wag dié groot mylpaal net ’n paar maande in die toekoms. Jy kan nie ’n hele ses jaar se werk in die volgende twee maande indruk nie, maar jy kan wel ’n bietjie “afrondingswerk” doen om haar te help, veral omdat 2020 wat skool betref so ’n deurmekaar jaar was.

Jy hoef nie jou kind nou verwoed te dril om alles te ken nie –so skrik jy haar dalk permanent van skool af! – maar jy kan speel-speel die bestaande vaardighede waaraan die graad O-juffrou gewerk het, beter vaslê sodat sy haar eerste ware laerskooljaar met selfvertroue kan binnegaan.

LEWENSVAARDIGHEDE

■ Skerp weer basiese goeie maniere by jou kind in. Dit sal vir haar baie deure oopmaak by onderwysers en maats.

■ Oefen sosiale en konflikhanteringsvaardighede en hoe om te deel om te verseker dat sy haar op die speelgrond kan handhaaf sonder om in ’n boelie of slagoffer te ontaard.

■ Speel balspeletjies met haar en doen moeite om groot motoriese vaardighede te ontwikkel. Laasgenoemde is uiters belangrik