Die syfertjies en bewerkings spring oormekaar en deurmekaar as jy daarna kyk; sin, cos en tan klink vir jou soos Chinese neefs; en die woord algebra is genoeg om jou ’n hol kol op die maag te gee. As wiskunde jou ongemaklik laat voel omdat jy jare lank op skool daarmee gesukkel het, is die kans goed dat jy nie ’n vreeslike behoefte daaraan het om jou eie kinders in wiskundige wonderkinders te omskep nie. Om die waarheid te sê, jy voel dalk hulle het glad nie wiskunde nodig nie: Jy oorleef immers al die jare daarsonder nadat jy dit op skool agtergelaat het.
Tog bly wiskunde belangrik. “Selfs al werk jy nie eendag in ’n wiskunderigting nie, help die kennis wat jy in die wiskundeklas opdoen jou daagliks om die wêreld om jou beter te verstaan,” sê Marise Oberholzer, medeskrywer van die boek en stigter van die Box ’n Dice-wiskunde-ontwikkelingsprogram vir jong kinders.
