Die denker van Randfontein
Hanlie Retief gesels met Neil Sandilands
“Daar is ’n verskil tussen nie drink nie en jou soberheid omhels.”
Dis ’n bos van ’n baard. Sy vingers krap onrustig daarin rond. Hy lyk soos ’n perdedief of ’n whisky-stoker. Of Hans die Skipper.
Totdat hy begin praat oor Nietzsche.
Maar jy katrol hom vinnig in, vooraf gewaarsku: Vir Friedrich Nietzsche sal Neil Sandilands in ’n drom diesel kan opspoor en drie uur daaroor aankap.
“Net één aanhaling, darem? An inexhaustible well to which no pail descends that does not come back filled with gold and goodness.”
Dis laataand. Toegewikkel in ’n dik, rooi serp op stel in Bedford in die Oos-Kaap. Sy gesig flikker op FaceTime, oë geskreef agter brillense.
Hierdie man.
Beskimmelde Bart van 7de Laan met sy duifies Breëbors en Bekkie wat onrusbarend gemorph het tot Titus in The 100 – en The Thinker, die donker boos-wig in die Amerikaanse superheld-TVreeks The Flash wat dreig in ’n aksent tussen Wes-Rand en Amerikaanse Weskus: “Life 101 . . . there are no happy endings”.
Die denker van Randfontein.
