‘Alles gaan oukei wees’
Die koronavirus-pandemie het enorme ontwrigting en onsekerheid vir skoolgaande kinders veroorsaak. Party skole is reeds oop, ander her-open binnekort en hoewel baie ouers en kinders dit verwelkom, is angstigheid oor die vreemde omstandighede byna onafwendbaar.
Ons het kenners gevra hoe ’n mens kinders van verskillende ouderdomme kan voorberei op die onsekerheid.
Gereed om terug te gaan
Elke kind se omstandighede is uniek. Elkeen reageer anders op die faktore wat stres meebring en só verskil dit wat stres verlig ook van persoon tot persoon.
“Mens moet kyk na hul ontwikkelingsvlak. Hoe jy jou kleuterskoolkind voorberei is heeltemal anders as iemand wat nou in matriek is,” sê prof. Irma Eloff van die departement opvoedkundige sielkunde
