Sukses geskoei op aanpasbaarheid
Die kommersiële beginsels waarvolgens mnr. Mornay Verster sy stoetery bedryf, laat staan telers tou vir sy Brangusse – bulle sonder ’n greintjie verbloemvet en veldaangepaste koeie wat min onderhoud verg.
Verster, een van die land se voorste Brangustelers, bedryf sy boerdery op twee plase, Brandsdrift en Eastry, in die distrik Tweespruit. Met sy een voet in Afrika en die ander in Frankryk met ’n uitgebreide onderneming, kry hy dit reg om sy stoetery van krag tot krag te laat gaan, met kopers van alle uithoeke van die land en selfs Namibië wat Le Roc Brangus se geharde diere verkies.
Op Eastry is ’n moderne en gerieflike veilingskompleks waar sy jaarlikse produksieveilings in Oktober gehou word.
Vanjaar, met die milde reën wat in die nasomer oor groot dele van die Vrystaat geval het, is ’n veiling ook in Februarie gehou wat goed ondersteun is.
Op hierdie veiling het hy al produserende koeie van agt tot tien jaar oud verkoop.
